ZHUAN FALUN

Duke Kthyer Rrotën e Ligjit

(versioni shqip)

LI HONGZHI

Version Interneti

Edicioni i Parë i Përkthimit (Prill 2004)

Kjo emblemë Faluni është universi në miniaturë. Ai ka gjithashtu formën e vet të ekzistencës dhe proçeset e zhvillimit në gjithë dimensionet e tjera; prandaj unë e quaj atë botë.

Li Hongzhi

“Buddha Fa”[2] është kaq e thellë; ndërmjet të gjitha teorive në botë, ajo është shkenca më komplekse dhe më e jashtëzakonshme. Në mënyrë që të eksplorojë këtë fushë, njerëzimit i duhet të ndryshojë thelbësisht të menduarit e vet konvencional. Përndryshe, e vërteta mbi universin do të mbetet një mister i përhershëm për njerëzimin dhe njerëzit e zakonshëm do të zvarriten përjetësisht brënda kufijve të kushtëzuara nga padija e tyre.

Por çfarë është “Ligji i Buddhës” në të vërtetë? Është fe? Është filozofi? Ky është vetëm të kuptuarit e “dijetarëve Budhistë të modernizuar”, të cilët vetëm studjojnë teori. Ata e konsiderojnë atë si kategori filozofike për studime kritike dhe të ashtuquajturin kërkim shkencor. Në fakt, “Ligji i Buddhës” nuk është vetëm ajo pjesë e vogël e dokumentuar në shkrimet e shenjta, sepse ajo është thjesht “Ligji i Buddhës” i nivelit elementar. “Ligji i Buddhës” është dritë mbi të gjitha misteret. Ai përfshin çdo gjë dhe nuk lë jashtë asgjë—që nga grimcat e vogla dhe molekulat deri tek universi, që nga më të voglat deri tek më të mëdhatë. Ai është shprehje e karakteristikës së universit, “Zhen-Shan-Ren”[3], e shprehur në nivele të ndryshme me nënkuptime të ndryshme. Ai është gjithashtu ajo që Shkolla Tao e quan “Tao”[4] apo ajo që Shkolla Buddhës e quan “Fa”[5].

Pamvarësisht sa e përparuar që ka arritur të jetë shkenca njerëzore e sotme, ajo është akoma veçse një pjesë e mistereve të gjithësisë. Sa herë që përmendim fenomene specifike të “Ligjit të Buddhës”, dikush do të pretendojë: “Kjo është tashmë epoka e elektronikës dhe shkenca ka përparuar kaq shumë. Anijet kozmike kanë fluturuar tashmë në planete të tjera, megjithatë ju akoma nxirrni këto paragjykime që i ka ikur koha.” Ta themi hapur, sado i përparuar të jetë kompjuteri, as që krahasohet me trurin njerëzor, që dhe sot e kësaj dite mbetet një enigmë e padepërtueshme. Sado larg të fluturojë një anije kozmike, ajo nuk mund të kalojë përtej këtij dimensioni fizik në të cilin ekziston rraca njerëzore. Ajo që mund të kuptohet me njohuritë njerëzore moderne është jashtëzakonisht e cekët dhe e pjesëshme; ajo është tepër larg të kuptuarit të vërtetës së universit. Disa njerëz as që guxojnë të ballafaqohen me këtë, të trajtojnë apo të pranojnë faktet e fenomeneve që ekzistojnë objektivisht, sepse ata janë tepër konservatorë e nuk duan të ndryshojnë të menduarit e tyre konvencional. Vetëm nëpërmjet “Ligjit të Buddhës” mund të zbulohen plotësisht misteret e universit, të kohë-hapësirës dhe të trupit të njeriut. Ai është i aftë që me të vërtetë të dallojë të virtytshmen nga e liga, të mirën nga e keqja dhe t’i japë fund ideve të gabuara duke dhënë pikëpamjet e sakta.

Parimi udhëheqës i shkencës së sotme njerëzore është i kufizuar vetëm në këtë botë fizike gjatë kërkimit dhe zhvillimit të saj, sepse një subjekt nuk studjohet derisa të pranohet që ekziston—pra ndjek këtë rrugë. Përsa i përket fenomeneve që janë të paprekshme e të padukshme në dimensionin tonë, por që ekzistojnë objektivisht dhe reflektohen në dimensionin tonë fizik si manifestime konkrete, njerëzit nuk guxojnë t’i studjojnë ato duke i përjashtuar si fenomene të panjohura. Njerëzit kokëfortë përpiqen të arsyetojnë pa baza se ato janë fenomene natyrore, ndërsa ata me motive të fshehta, në kundërshtim me vetë ndërgjegjen e tyre, i emërtojnë ato thjesht si paragjykime. Ata që nuk duan t’ja dijnë, thjesht i rrinë larg çështjes me pretekstin se shkenca nuk është akoma e zhvilluar aq sa duhet. Nëse njerëzit janë të aftë t’i hedhin një shikim të ri vetes dhe gjithësisë dhe të ndryshojnë mentalitetet e tyre të ngurta, njerëzimi do të bënte një hap të madh përpara. “Ligji i Buddhës” e bën njerëzimin të aftë të kuptojë botët e pamatshme dhe të pafundshme. Gjatë gjithë epokave, vetëm “Ligji i Buddhës” ka qënë i aftë të japë një shpjegim të qartë të njerëzimit, të çdo dimensioni të ekzistencës materiale, jetës dhe të gjithë universit.

Li Hongzhi

2 qershor 1992